حەسەن زیرەک، لە 29ی تشرینی دوەمی 1921 لە بۆکان لەدایکبوە، لە ماوەی تەمەنیدا توانیویەتی زۆرترین گۆرانی پێشکەش بە گەنجینەی هونەری کوردی بکات و گۆرانیشی جگە لە زمانی کوردی بە زمانەکانی تورکی و فارسی چڕیوە.

حەسەن زیرەک، لە 26ی حوزەیرانی 1972 لە بۆکان بەنەخۆشی کۆچی دوایکردوە و هەرلەوێش نێژراوە و هەموو کوردێک کاتێک دەچێتە کوردستانی ئێران و سەردانی بۆکان دەکەن، ئەستەمە نەچنە سەر گۆڕی ئەو هونەرمەندە گەورەی کورد و وێنەی یادگاری لێ نەگرن. لە ماوەی ژیانی ھونەری، حەسەن زیرەک دەربەدەری زۆری چێشتوە. ماوەیەک لە شارەکانی ئێران و ماوەیەک لە عێراق. لە ڕۆژانی دەستپێکی ژیانی لە باشوری کوردستان لە شاری سلێمانی کاریدەکرد.

ڕۆژێک بەدەم کارەوە لەژێر لێودا گۆرانی دەخوێنێت، ئەو گۆرانییە و دەنگی زیرەک ھەستی ڕێبوارێک دەبزوێنێ و ئەو ڕێبوارە دەبێتە ھۆی گۆڕانکاری لە ژیانی زیرەکدا و ڕێگەی بۆ دەکاتەوە بڕواتە ڕادیۆی بەغداد. لە ساڵی 1958 گەڕاوەتەوە بۆ ئێران، لەوێ چوەتە ڕادیۆی تاران، ھەر لەو ساڵەدا لە ڕادیۆی تاران لەگەڵ میدیا زەندی ئاشنا دەبێت و پێکەوە ژیانی ھاوبەش پێک دێنن کە ئاکامی ئەو ژیانە دو منداڵ بە ناوەکانی (مەھتاب) و (ئارەزوو) دەبێ.

پاشان حەسەن زیرەک ماڵەکەی دەباتە شاری بانە و لەوێ لە «کانی مەلا ئەحمەد» چایخانەیەک دادەمەزرێنێ، دیارە شان بە شانی ئەو کارەش لە گۆرانی وتن و کاری ھونەری ناوەستێ و لە بەزم و شادی خەڵکدا بەشداریدەکات و بە بۆنەی جۆراوجۆرەوە گۆرانی تۆمار دەکات. پاشان دەچێتە شاری مەھاباد و لە دواکاتەکانی ژیانیشیدا دەچێتە شاری شنۆ. لە شاری شنۆ بە کار و کاسبی ژیان تێپەڕدەکات.

لە ساڵانی 1960 – 1961 لە شاری سلێمانی لە تیپی «شانۆی ھونەرەجوانەکان» لەگەڵ «سێوەخان» و «ڕەشۆڵ عەبدوڵڵا» لە شانۆکای «بوکی ژێر دەواری ڕەش» و «خەسو یان ئەژدیھا» و «تەڕپیر» بەشداریکردوە.

لە نێوان ساڵانی 1967– 1968 لە شاری سەقز ھۆتێلی سێ ئەستێرەی ھەبووە کە بۆ خۆی لەوێ گۆرانی وتووە.